Nga    Reuters

Flamujt qëndruan sot në gjysmë shtizë, ndërsa Rusia dhe Gjeorgjia vajtuan të vdekurit e tyre pas pesë ditësh luftime lidhur me rajonin separatist të Osetisë së Jugut, pas vendosjes së një armëpushimi të nxitur nga BE-ja. Rajoni i shkëputur dhe zonat pranë tyre në Gjeorgji ishin kryesisht të qeta mbrëmë pasi palët ndërluftuese pranuan dje në parim një plan të ndërmjetësuar nga presidenti francez, Nikola Sarkozi në emër të Bashkimit Europian. Fuqia e madhe ushtarake ruse e poshtëroi Gjeorgjinë, e cila filloi të enjten e kaluar një sulm të pasuksesshëm për të rimarrë rajonin prorus e Osetisë së Jugut, duke shkaktuar një kundërsulm masiv nga Moska. Konflikti hapi një hendek diplomatik midis Shteteve të Bashkuara të Amerikës dhe Britanisë, të cilat dënuan "agresionin e zhurmshëm" të Moskës, dhe Francës, Italisë dhe Gjermanisë, të cilat u përpoqën të shmangnin me kujdes kritikat ndaj Rusisë, një furnizuese kryesore me energji dhe partnere në biznes. Analistët theksojnë se përpjekja e dështuar e Sakashvilit për të marrë kontrollin e Osetisë së Jugut me anë të forcës e ka bërë më pak të mundshëm rikthimin e territorit të shkëputur, së bashku me një rajon tjetër rebel, Abkhazisë, nën kontrollin e Tbilisit në të ardhmen. Në Bruksel, ministrat e Jashtëm të Bashkimit Europian dëgjuan një raport nga ministri i Jashtëm francez, Bernard Kushner lidhur me misionin e paqes. Ai i kërkoi bllokut të dërgojë monitorues paqeruajtës në Osetinë e Jugut për të ndihmuar mbështetjen e armëpushimit. Brenda dhe përreth kryeqytetit të Osetisë së Jugut, Tskhinvali, që u shkatërrua gjatë sulmeve gjeorgjiane, dëgjohen ndonjëherë të shtëna armësh të vogla, por nuk ka pasur asnjë incident të rëndësishëm. "Situata në vend është ajo e pas luftës", deklaroi zëdhënësja e Osetisë së Jugut, Irina Gagloyeva. "Duke përfituar nga kjo periudhë qetësie, po përpiqemi të varrosim sërish personat e vrarë gjatë agresionit gjeorgjian". "Shumë prej tyre u varrosën me shpejtësi në vendin ku u vranë, në kopshte dhe oborret e pasme. Dje nxorëm 18 trupa nga rrënojat në Tskhinvali. Sot gjetëm katër të tjerë", shtoi ajo. Rusia deklaroi se 1 600 civilë kanë vdekur pasi Gjeorgjia sulmoi Osetinë e Jugut, megjithatë kjo shifër nuk është konfirmuar ende. Shtabi i Përgjithshëm i Moskës theksoi se ka humbur 74 ushtarë në përleshje, 171 janë plagosur dhe 19 janë zhdukur. Tbilisi thekson se nga përleshjet kanë vdekur më shumë se 175 persona, ndërsa qindra të tjerë janë plagosur. Në këtë shifër nuk përfshihet Osetia e Jugut. Moska theksoi sot se do të miratojë një paketë ndihmash emergjente për Osetinë e Jugut, ku ministri i Financës, Alexei Kudrin premtoi 414 milionë dollarë për të ndihmuar në rindërtimin e rajonit të shkatërruar. Ndërkohë, Gjeorgjia e akuzoi Rusinë se ka dërguar sot dhjetëra tanke në qytetin gjeorgjian Gori, 25 kilometra në jug të Tskhinvalit. Moska i ka mohuar pretendimet dhe një dëshmitar në qytet, vendlindja e liderit sovjetik, Josef Stalin, deklaroi për agjencinë Reuters se nuk kishte parë asnjë rus. "Kam qenë në të gjithë qytetin. Nuk ka tanke. Nuk ka rusë", deklaroi ai. Dëshmitarët theksuan se forcat ruse kanë ngritur dy postblloqe në periferitë e qytetit Gori dhe kanë marrë një bazë të braktisur gjeorgjiane 4-5 kilometra larg qendrës së Gorit. ojmë si qenie njerëzore ndaj qenieve njerëzore, kujtoni humanizmin tuaj e harroni çdo gjë tjetër”.